Interview 總係臨門撻Q?你可能無注意到3 個職場禮儀

「其實我份 CV 都 OK 啊,講嘢都正正常常,就算唔係標青,都不至於工都搵唔到掛。」Kelvin 一臉苦惱地對我說。


看著他的 CV,加上根據對他的認識,的確是沒甚麼問題。


「不如同你做個模擬 Interview,睇下邊度出咗問題。」我始終覺得,Interview 一次失敗是正常,兩次是巧合,三次是倒霉,再失敗就是有問題。


Kelvin 好像遇溺抓到浮木一般,忙不迭地點頭。

我安排 Kelvin 坐在一間房間內等待,由我扮演 Interviewer。


當我入去的一刻,Kelvin 只望了一眼,沒有任何反應。我走過他身邊,主動伸手與他握手;Kelvin 繼續坐在位上,伸出手回應。


我沒作聲,示意面試開始。Kelvin 將電話設為靜音放在桌上,雖然期間不斷有 Notification,但一直沒有響過。


面試過程沒有甚麼特別,表現正常。


Interviewer 入嚟要企起身?

「咁樣你就 GG 啦。」我嘆了口氣。


「下?」Kelvin 一臉愕然地望向我,「我咩都無做過喎。」


「當 Interviewer 開門入嚟,應該企一企起身,咁樣會禮貌啲。」我一邊說一邊站起來,「同埋你握手個陣,最好就主動伸手先,同埋唔好坐係度握手。」

「我嚟見工姐,又唔係相睇,做得嘢咪得囉!」Kelvin 一臉不耐煩地對我說。


「啱呀。」我聳了聳肩,「但如果其他 Interviewee 同你差不多 Level,咁咪蝕章囉。你係入到 Second Round 呀,但就係輸係啲細節。」


「咁我仲差啲咩?」Kelvin 沒再爭辯下去,待我解答。


「都係握手。」


握手力度要幾大?

當 Interview 開始前,可以考慮和對方握手打招呼。當然,如果手汗太多,最好先抹一下,畢竟沒人喜歡握一隻濕漉漉的手。


「我以為係 Interviewer 伸手先。」Kelvin 若有所思地說。「人地伸手先梗係要握,但其實握手除咗係禮貌,仲可以睇到好多嘢。」我伸出手來,示意 Kelvin 來感受一下。

一般而言,握手應稍微用力,以示熱情。尤其男士間的握手更可以用力一點,對女士則可以輕力一點。如果對方與你的手緊緊相握,亦應以同等力度回應。


「姐係好似你依家握到軟奶奶咁咪唔 OK 囉。」我指著他那隻有氣無力的手,「握手一定要夠 Firm,夠 Firm 會顯得你夠自信、夠肯定,就會增加你嘅印象分。」


電話擺檯面得唔得?

「最後就係電話。」我呷了一口咖啡,「我有較震機呀。」Kelvin 搶著道。


「呢個基本啦,同埋唔好擺電話係檯面。」我放下咖啡杯,「始終 Interview 唔係朋友食飯,收埋電話係基本尊重。」


「我曾經 In 過一個人,他有將電話較靜音,但就勁多 WhatsApp,個 Mon 閃嚟閃去。每閃一下,佢就好自然咁偷瞄一下;」我吐了口氣,「搞到佢隻眼好似 AE86 咁飄嚟飄去。」

當你的電話放在桌上,就容易影響雙方注意力。就算你忍得住不看一眼,也不代表 Interviewer 可以不分心;倒不如收進褲袋,讓雙方都可以專心面試。


「都幾多嘢要記,都唔知記唔記得哂。」Kelvin 抱著頭,狀甚苦惱。


「你唔好諗住去見工,當係去見岳父岳母,個觀感就會 Fit 哂。」


Kelvin 略一沉思,「又真係幾似。」


沒錯,其實說穿了,Interview 禁忌就是和長輩相處的基本禮儀,只不過平時對朋友、平輩較少留意。不妨想想和長輩的相處方式,是否與上司的方式有點類似?

Copyright ©Dozen Base Limited. All Rights Reserved.

關於拾貳初衝

職涯導向

​聯絡我們

+852 2391 2928

Unit 1703, 909 Cheung Sha Wan Rd, Cheung Sha Wan

  • Facebook
  • Instagram